जीवन परिघ

एक परिघ आंखले ,  विधात्याने विश्वाभोवतीं,
जीवन फिरते ,  त्याचे वरती ।।१।।

वाहण्याची क्रिया चाले,  युगानुयुगें ह्या जगतीं,
कुणी ना सोडी लक्ष्मण रेखा,  एकांच परिघात फिरती ।।२।।

जेंव्हां कुणीतरी थकून जाई  दुजा उठोनी मदत करी,
जीवन मरणाची शर्यत  जिंकण्यासाठीं लक्ष्य धरी ।।३।।

मध्य बिंदूच्या स्थानीं बसूनी  नियंत्रित करी जगाला,
परिघ सोडूनी जाण्यासाठीं  दिसत नसे मार्ग कुणाला ।।४।।

प्रयत्न तुमचा सदा असावा  मध्यबिंदूकडे सरकण्याचा,
शक्तीरुप तेथेंच असूनी  त्याच्यांत सामावून जाण्याचा ।।५।।

भीती मनीं वसते  कसे जाऊं आंसाकडे,
तुकडे होतील देहाचे जेव्हां आसांत पडे ।।६।।

सोडूनी देण्या सारा खेळ  केंद्रस्थानी जाणे, मार्ग असे,
विसरुन जाता देहाला  प्रभू समर्पण करण्यांत असे ।।७।।

डॉ. भगवान नागापूरकर
संपर्क – ९००४०७९८५०
bknagapurkar@gmail.com