जीवनाची उपयोगिता

दहा पंधरा तीं वर्षे राहिली, उम्मीदपणाच्या हालचालीची

मना वाटते आगळे करावे,  उरली वर्षे जी जीवनाची….१,

वृधत्वाचा काळ गांजता,  साथ न देयी शरिर कुणाला,

मना मारूनी बसावे लागे,  ईश्वरी नाम घेत सर्वाला….२,

निसर्गरम्य स्थळ निवडूनी,  मर्यादेत जगावे जीवन

दुजास कांहीं येईल देता   हेच ठरवावे आजमावून…३,

बरेच केले स्वत:साठीं,  समाधान परि नाहीं लाभले

दुजास मिळतां आनंद येई,  खरे तत्त्व ते आज जाणले….४,

जेंव्हां करितो स्वत: करिता,  स्वार्थी भाव तो लपला असे

दुजासाठी ते करिता सारे , स्वार्थी भाव ते राहील कसे ?….५,

शेवटचे ते सरते जीवन,  प्रभू चरणी ते समर्पण व्हावे

हात जोडूनी विनंती करतो,  दुजाच्या सेवेतच निघून जावे…६

 

डॉ. भगवान नागापूरकर

९००४०७९८५०

bknagapurkar@gmail.com