मी खुदकन हसलो
तू गालात हसतेस
मी रडरड रडलो
तू छातीशी धरतेस
मी शाळेत असताना
वाट सारखी पाहतेस
डबा तसाच दिसला
तू लालेलाल होतेस
असे माझा वाढदिवस
तू दिनरात राबतेस
आयाबाया बोलावून
ओवाळणी करतेस
कधीतरी साजरा कर
आई तुझा वाढदिवस
आम्हीही भरवू तोंडी
पेढ्यांचा जो गोडघास
आई , बन तू लेकरू
आम्ही तुझी माय होवू
तुला झोक्यात टाकून
सुखे दोन झोके देऊ !
जमवून सर्व मित्रांना
वाढदिवस तुझा करेन
जन्मोजन्मी हीच माय दे
अशी मागणी मागेन
विठ्ठल जाधव
शिरूरकासार, जि.बीड
सं.९४२१४४२९९५
(दिव्यमराठी,१०मे२०१८)
Leave a Reply