असंच आपलं इकडलं तिकडलं

एक होता राजा त्याची काय मजा
त्यानं खाल्ला काऊ पोटात झाला बाऊ ।।१।।

एक होती मनीमाऊ तिचा काळा काळा भाऊ
त्याचं झालं लग्न मनी आपली खाण्यात मग्न ।।२।।

लाल लाल टोमॅटो अंगाने जाडजूड
त्याला भेटली मिरची गेला त्याचा मूड ।।३।।।

एक होती गाय तिला चार पाय
एका पायाने लंगडी शिंगात घाली बांगडी ।।४।।

उंदराच्या पाठीवर हत्ती झाला स्वार
हलेना बोलेना त्यानं खाल्ला मार ।।५।।

सिंहाच्या आयाळात लपून बसली ऊ
वाघाला वेडावते तुझी माझी गट्टी फू ।।६।।

आंब्याच्या वनामध्ये मोर झाला राजा
लांडोर मागून नाचते हीच त्याला सजा ।।७।।

वांदरात वांदर काला बंदर
नाकात घाली डूल कानानी हुंगी फूल ।।८।।

— द्वारकानाथ शंकर (जयंत) वैद्य