गझल
वृत्त: मेनका
लगावली: गालगागा/गालगागा/गालगा
***********************************
दर्शनी तर घर खुराड्यासारखे
आतुनी पण ते महालासारखे
एकटा बहुधा असा सम्राट मी
वागणे ज्याचे फकीरासारखे
भाव थोडा, आव जास्ती वाटतो
बोलणे त्यांचे प्रचारासारखे
हे हृदय रात्री धुमसते केवढे
हुंदके देते स्मशानासारखे
बोलले डोळ्यातले पाणी मुके
वाटले तेही प्रमादासारखे
टवटवी अन् रंग दोघांचे असे
ती नि मी दिसतो गुलाबासारखे
आमचे सगळेच आहे वेगळे
भांडतोही प्रेम केल्यासारखे
ही दिशांची जंगले, मी एकटा
वाटते मज जग शिका-यासारखे
त्यामुळे तर नोकरी टिकली अरे,
कष्ट केले मी गुलामासारखे
लाभला मज जन्म तर राईपरी
दु:ख का माझे पहाडासारखे
— प्रा. सतीश देवपूरकर
