सत्तरच्या दशकातील शहरी महाराष्ट्रीय मध्यमवर्गीय चित्रपट रसिकांना अमोल पालेकरच्या हिंदी चित्रपटसृष्टीतील घौडदौडीचे विशेष कौतुक होते. त्यातही त्याने काही quality pictures मध्ये त्याने भूमिका साकारल्याने तर तो लाडका नायक झाला. असाच एक महत्त्वाचा चित्रपट म्हणजे ह्रषिकेश मुखर्जी दिग्दर्शित ‘गोलमाल ‘ ( रिलीज २० एप्रिल १९७९) च्या प्रदर्शनास तब्बल ४३ वर्षे पूर्ण होत आहेत.
मुंबईत ड्रीमलॅन्ड थिएटरमध्ये या चित्रपटाने खणखणीत रौप्यमहोत्सवी यश संपादले. या चित्रपटातील अमोल पालेकर यांची रामप्रसाद आणि लक्ष्मीप्रसाद दशरथप्रसाद शर्मा अशी दोन रुपे घेतलेली भूमिका आणि त्यांचा आपले कार्यालयीन बॉस भवानी शंकर ( उत्पल दत्त) यांच्याशी झालेला गंमतीदार संघर्ष या सूत्राभोवती हा खुसखुशीत मार्मिक मिस्कील मनोरंजक चित्रपट रंगला.
एन. सी. सिप्पी निर्मित या चित्रपटाची कथा शैलेश डे यांची तर पटकथा सचिन भौमिक यांचे तर संवाद डाॅ. राही मासूम रझा यांचे आहेत. छायाचित्रण जयवंत पाठारे यांचे आहे. या चित्रपटात बिंदीया गोस्वामी, डेव्हिड, देवेन वर्मा, दीना पाठक, अंजन श्रीवास्तव, शुभा खोटे, युनुस परवेझ, केश्तो मुखर्जी, मंजू सिंग, ओम प्रकाश इत्यादींच्या प्रमुख भूमिका आहेत. तसेच अमिताभ बच्चन, रेखा, हेमा मालिनी, झीनत अमान इत्यादींच्या पाहुणे कलाकार म्हणून भूमिका आहेत. या चित्रपटाला राहुल देव बर्मनचे संगीत आहे. आनेवाला पल जानेवाला है ( पार्श्वगायक किशोरकुमार), एक दिन सपने में देखा सपना ( किशोरकुमार आणि अमितकुमार), गोलमाल है सब गोलमाल है ( सपन चक्रवर्ती व आर. डी. बर्मन), एक बात कहू गर मानो तुम ( लता मंगेशकर) या चित्रपटातील ही गाणी आजही लोकप्रिय आहेत. स्वच्छ चित्रपटाच्या चाहत्यांना हा चित्रपट मस्त मनोरंजन आहे.
संकलन: संजीव वेलणकर.
९४२२३०१७३३
पुणे.
Leave a Reply