जीवन परिघ

एक परिघ ते आंखले आहे
विधात्याने विश्वाभोवतीं
जीवन सारे फिरत असते
एक दिशेनें त्याचे वरती   १

वाहण्याची ती क्रिया चालली
युगानुयुगें ह्या जगतीं
कुणी ना सोडी लक्ष्मण रेखा
एकांच परिघात सारे फिरती   २

जेंव्हां कुणीतरी थकून जाई
दुजा उठोनी मदत करी
जीवन मरणाची शर्यत
जिंकण्यासाठीं तो लक्ष्य धरी   ३

मध्य बिंदूच्या स्थानीं बसूनी
नियंत्रित कुणी करी जगाला
परिघ सोडूनी जाण्यासाठीं
दिसत नसे मार्ग कुणाला   ४

प्रयत्न तुमचा सदा असावा
मध्यबिंदूकडे तो सरकण्याचा
शक्तिरुप ते तेथेंच असूनी
त्याच्यांत सामावून जाण्याचा   ५

भिती तुमच्या मनीं वसते
कसे जाऊं त्या आंसाकडे
तुकडे होतील ह्या देहाचे
जेव्हां त्या आसांत पडे   ६

सोडूनी देण्या तो सारा खेळ
केंद्रस्थानी जाणे, मार्ग असे
विसरुन जाता ह्या देहाला
प्रभू समर्पण करण्यांत असे   ७

डॉ. भगवान नागापूरकर
९००४०७९८५०
bknagapurkar@gmail.com