मी वाचणारच (ओवीबद्ध रचना)

मला वाचवा वाचवा
नका खुडू हो या जीवा
जग आम्हा ही दाखवा
मी मोलाचा ठेवा।।१।।

अधिकार जन्मायचा
आशिर्वाद ईश्वराचा
हक्क स्वप्न बघायचा
का हिसकावता।।२।।

मी देशाचा अभिमान
हवा तुम्हा स्वाभिमान
कराल माझा सन्मान
प्रजा टिकवाल।।३।।

जगा आणि जगू द्या हो
दिवा विझता इथे हो
पणती कामा येई हो
तिला जगवा हो।।४।।

मी धडपडणारच
मी जगी वाचणारच
तुमची चिंता खरच
मी करणारच।।५।।

सौ.माणिक शुरजोशी
नाशिक