नांव पांडुरंग कसें ?

(गझलनुमा गीत)

 

रंग तुझा सावळाच, नांव पांडुरंग कसें ?

लक्ष भक्त पाहतात लक्ष तुझे रंग कसे  ?

 

हात कटीवर ठेवुन  विटेवरी स्तब्ध उभा

रूप तुझें ठायिं ठायिं तरि भक्तांसंग कसें ?

 

रौद्र ऊन थंडी वा मुसळी पाऊस असो

दुर्लक्षुन ऋतु, नामीं वारकरी दंग कसे ?

 

नाचतात वैष्णवजन, देहभान विस्मरुनी

वेड असें लावतोस भक्तांना, सांग, कसें ?

 

फक्त स्वानुभवानेंच आकळतें हें मनुजा –

‘पांडुरंग’ नाम मना आणतसे झिंग कसे ।।

 

दामाजीचा ‘महार’, नाथांचा श्रीखंड्या

विठुराया, नित्यनवें वठवतोस सोंग कसें ?

 

पंढरिच्या भेटीनें भीमा बनते ‘गंगा’

नवल नसे  –  अमृत बनती तिचे तरंग कसे ।।

 

बह्मांडाहुन विशाल  तूं, धूलिकणच मी

तरि वसशी मम हृदयीं, फेडूं तव पांग कसे ?

 

शीश तुझ्या चरण नत, पुरव हेंच मागणें –

शिकव  –  ‘जन्ममृत्युचक्र करायचें भंग कसे’ ।।

— सुभाष स. नाईक

पंढरीचा राणा