नारायण भंडारीचं काय झालं ? भाग १

।। सोमि सिरीज : भाग १।।

तो धावत होता .
ऊर फुटेस्तोवर धावत होता .
दिशाहीन . तहानभूक विसरून .
अगदी सकाळपासून .

– कुणीतरी त्याला बसथांब्यावरच्या भल्यामोठ्या फ्लेक्सचा फोटो पाठवला होता . व्हॉट्सअपवर .
फ्लेक्स चा फोटो बघून तो हादरला होता .
अविश्वासाच्या नजरेनं तो पुन्हा पुन्हा पहात होता .

थोड्या वेळाने आणखी काही ग्रुप्सवरून त्याच प्रकारच्या फ्लेक्सचे फोटो त्याच्या स्क्रीनवर येऊ लागले . शहरातील वेगवेगळ्या ठिकाणचे .
फ्लेक्सचा साईझ तोच .
फोटो तोच .
कॅप्शन तीच .
नारायण भंडारीचं काय झालं …?

त्याच्या लक्षात आलं .
काहीतरी गडबड झाली आहे .
त्याचं नाव , त्याचा फोटो वापरून कुणीतरी जबरदस्त धमाका उडवून दिला होता .

पण का ?
कशाकरता ?

शहरातील असंख्य नागरिकांना तोच प्रश्न पडला होता .
कदाचित मालिका , मुव्ही , वेबसिरीज ची ही जाहिरात असावी , असा विचार करून नागरिकांनी घड्याळाच्या काट्यावर धावायला सुरुवात केली होती .

पण तो मात्र धावत होता .
ऊर फुटेस्तोवर धावत होता .

अचानक तो थांबला .
समोर काटेरी तारेचं कुंपण होतं .
त्याच्या आत भली मोठी केळीची बाग होती .
त्या कुंपणाच्या आत चार क्रूर कुत्रे होते .
त्यांच्या डोळ्यातून आग आणि तोंडातून लाळ गळत होती .
वखवखलेली जीभ स्पष्ट दिसत होती …

त्याच्या लक्षात आलं .
आठ दिवसांपूर्वी तो अनावधानानं इथंच आला होता .
अगदी अनपेक्षितपणे .

अंधार पडायला सुरुवात झाली होती .
पाणी प्यायला म्हणून तो थांबला .
ते ठिकाण हेच होतं .

फार्महाऊसचा लाईट दिसल्यानं , गाडी साईड स्टँडला लावून तो पुढं आला .
कुणाचीतरी हालचाल दिसल्यानं तो हाक मारायला पुढं झाला .
आणि समोर अंधारात नजर रोखून बघताच त्याला जे दिसलं त्यामुळं तो पुरता हादरून गेला .
त्याच्या घशाला कोरड पडली .
पण त्याही स्थितीत त्यानं मोबाईलवर फोटो काढला .
आणि तिथेच घात झाला .
फ्लॅशमुळं आतल्यांचं लक्ष गेलं .
आणि ते सगळे आणि कुत्रे त्याच्या दिशेनं येऊ लागले .
आपलं मरण ओळखून तो बाईककडे धावला आणि बाईक शहराच्या दिशेनं पळवली .

बऱ्याच वेळानं त्याचा श्वास नियमित झाला .
गाडी थांबवून त्यानं मोबाईलवरचा फोटो पाहिला .
आणि पुन्हा तो हादरला .
काही गुंड कुत्र्यांना काहीतरी खायला घालत होते .
त्यानं नीट निरखून पाहिलं .
वीतदीडवीत उंचीची लहान लहान हाडं..

हे काहीतरी भयानक आहे , हे त्याच्या लक्षात आलं .
तो तसाच सुसाट सुटला आणि जवळच्या पोलीस स्टेशनमध्ये शिरला.
पोलिसांना त्यानं मोबाईलवरचा फोटो दाखवला .
पोलिसांनी गोड बोलून त्याचा मोबाईल हाती घेतला आणि पटकन फोटो डिलीट केला .

…आणि सुजल्या चेहऱ्यानं , फाटलेल्या कापड्यानिशी तो कसाबसा बाहेर आला .
मोठ्या कष्टानं बाईक सुरू केली आणि घराच्या रस्त्याला लागला.

घरी आल्यावर त्यानं पुन्हा मोबाईल बघितला .
त्याच्या सुदैवानं अजून एक फोटो शिल्लक होता .
त्यानं मागचा पुढचा विचार न करता फोटो व्हायरल करायला सुरुवात केली .

– आणि न्यूज चॅनल्सचा टीआरपी प्रचंड वाढू लागला .

फोटो कुणी काढला हे नाव लपून राहणं शक्यच नव्हतं .
सायबर सेलनं आपलं काम अचूक केलं .

आणि त्या दिवसापासून नारायण धावू लागला .
ऊर फुटेस्तोवर धावू लागला .
धावता धावता तो विचार करत होता .
तो मळा कुणाचा ?
ते गुंड कुणाचे ?
ते कुत्रे कुणाचे ?
आणि ती वीतभर उंचीची हाडं कुणाची होती ?

त्याला प्रश्नांची उत्तरं काही मिळाली नाहीत .

पण अशी उत्तरं शोधण्यासाठी , अनैतिक , बेकायदेशीर असं जिथे जे काही जाणवेल ते शोधण्यासाठी तो सगळ्यांच्या अगोदर तो पोचू लागला .

– पण आज कहर झाला होता .
सगळीकडे त्याचे फ्लेक्स लागले होते .
आणि तो ऊर फुटेस्तोवर धावू लागला होता …!
( क्रमशः )

(नारायण भंडारी या नावासह पूर्णतः काल्पनिक . यातील घटना प्रसंगाचा वास्तवाशी कोणताही संबंध नाही , तसा कुणाला आढळला तर तो योगायोग समजावा .)

— डॉ. श्रीकृष्ण जोशी

ही सोमि सिरीज ( सोशल मीडिया सिरीज ) नावासह सर्वत्र पाठवायला हरकत नाही.