‘सदरा’ घातलेला ‘सुखी’ माणूस

सुखी माणसाचा सदरा मिळणे म्हणजे परीस मिळण्यासारखंच असतं..सुखी माणसाचा सदरा ही एक सुंदर कल्पना असल्याचे सर्वांनीच मान्य केले असले तरी त्या सदऱ्याचा शोध सुरूच असतो, निरंतर सुरुच राहाणार..

या सदऱ्याची कल्पना बहुतकरून मराठी जनांमधेच आहे की अन्य समाजातही आहे याची मला माहिती नाही परंतू तशी ती नसल्यास सुखासाठी अन्य काहीतरी परिधान करावं असं वाटण्यासारखं त्यांच्यातही असणारच..

मला समजायला लागल्यापासून इतरांप्रमाणे माझाही या सदऱ्याचा शोध सुरुच होता..अनेक पुस्तकांच्या वाचनातून, फिल्म्स बघताना सदरा कसा असावा, त्याचं फिटींग-पॅटर्न-रंग कसा असावं याच्या बद्दल मतंही बदलंत होती..

आणि अगदी आता, काही महिन्यापूर्वी मला अगदी माझ्या मापाचा, मला आवडणाऱ्या रंगा-पॅटर्नचा, जणु काही माझ्यासाठीच शिवलाय असा वाटणारा सदरा मला मिळाला. मिळाला कसला, माझ्याकडेच होता पण तो ‘सुखा’चा सदरा होता हे मला आत्ता आत्ता कळलं..मला आवडणारी कोणतीही गोष्ट करताना तो सदरा अदृष्य रुपाने माझ्या अंगावर असतो..तो सदरा अंगावर असताना मला माझा स्वत:चाही विसर पडतो..अगदी समाधी लागते म्हणा ना..! आणि समधीत परमोच्च आनंद मिळतो हेच तर सारे साधू-संत-महात्मे सांगून गेलेत ना..?

आता मला कळतंय की प्रत्येक माणसाकडे को सदरा असतोच आणि तो आनंदाच्या, सुखाच्या क्षणी तो परिधान करतच असतो..आता बघा ना, सणा-समारंभाला, लग्नकार्याला, नाटक-संगीताच्या कार्यक्रमाला जाताना पराठी माणूस हटकून सदरा-लेंगा घालूनच जाणार..आपल्याला आवडणाऱ्या, मनाला सुखावणाऱ्या आनंदाच्या प्रसंगी मराठी माणूस हटकून सदराच परिधान करणार..

कला-साहीत्य-संगीत आणि हो, अध्यात्म यात रमणारे जीव खरोखर सुखी असतात..आणि म्हणून ते सदरा घालत असतात असा मला लागलेला शोध आहे..त्यांनाही जीवनातील समरप्रसंग असतातच परंतू एकदा का ‘तो’ सदरा घातला की त्या सर्वांची विसर पडून ते सुखाच्या सर्वोच्च शिखरावर आसनारुढ झालेले असतात..किंवा मग एखाद्या प्रसंगी आपल्याला ‘सदरा’ घालावासा वाटला की समजावं आपण ‘सुखी’ झालो आहोत असं माझं ठाम मत झालंय हल्ली..!!

आपल्या सर्वांना गणेशोत्सवाच्या मन:पूर्वक शुभेच्छा..!! उद्या आपल्याकडे बाप्पा येणार म्हणजे उद्यापासून १० दिवस अवघा महाराष्ट्र ‘सदऱ्या’त दिसणार म्हणजे ‘सुखा’च्या सागरात तरंगत असणार..

बघा या फोटोतल्या बाळाकडे..लहान मुलं ‘सुखी’ असतात आणि ते दर्शवण्यासाठी तर फोटोतल्या या बाळाने ‘सदरा’ घातलेला नाहीय ना?

जाता जाता

एक शंका- पुरूषांनी सुखाचा सदरा मिळवावा असं सर्वच म्हणतात. बायकांनी सुखासाठी काय घालावं याची कुठेच माहिती मिळत नाही.  त्यांना सुखाची गरज नाही असं आपल्या पुर्वसुरींना वाटलं असावं की त्या नेहेमी सुखीच असतात असं त्यांना वाटलं असावं हे समजण्यास काही मार्ग नाही. परंतू स्त्रीयांकडे कोणताही प्रसंग सुखद बनवण्याची अचाट जादू असते हे मात्र नक्की.!

गणेश साळुंखे
9321811091
salunkesnitin@gmail.com