समाधानी वृत्ती

कशांत दडले समाधान ते
शोधत असतो सदैव आम्ही
धडपड सारी व्यर्थ होऊनी
प्रयत्न ठरती कुचकामी

बाह्य जगातील वस्तू पासूनी
देह मिळवितो सदैव सुख
क्षणीकतेच्या गुणधर्माने
निराशपणाचे राहते दुःख

‘समाधान’ ही वृत्ती असूनी
सुख दुःखातही दिसून येती
चित्त तुमचे जागृत असतां
समाधान ते सदैव मिळते

सावधतेने प्रसंग टिपता
समाधान ते येईल हाती
सुख दुःखाला दुर सारता
अंतरभागी समाधान दिसती

डॉ. भगवान नागापूरकर
९००४०७९८५०