शिरोमणी, सुषमा

मराठी चित्रपटांमध्ये पारंपारिक स्त्री व्यक्तीरेखेला काहिसा छेद देऊन त्याजागी “डॅशिंग वुमन” आणि “तडफदार स्त्री” ची व्यक्तीरेखा साकारण्याचं काम सुषमा शिरोमणी यांनी चपलखपणे साध्य केलं; मराठी सिनेमामध्ये सर्वप्रथम “भिंगरी” या चित्रपटातून “आयटम सॉंग” चा ट्रेंड हा सुषमा शिरोमणींमुळे रुजला आणि तोही मराठमोळ्या ढंगात. अॅक्शन हिरोईन म्हणून वैविध्य भूमिका साकारणार्‍या सुषमा शिरोमणीया मूळ कोल्हापूरच्या व त्यांचा जन्म १९ नोव्हेंबर चा; खरंतर सुषमा शिरोमणी यांचा व त्यांच्या कुटुंबियांपैकी अगदी दूरवर चित्रपटांचा संबंध नव्हता, पण योगायोगाने म्हणा किंवा जबरदस्ती अक्षरश: त्या या क्षेत्रात ओढल्या गेल्या ते “दाम करी काम” या चित्रपटामुळे ते देखील अभिनेत्री व निर्मिती म्हणूनच; त्यांचा सुरुवातीचा चित्रपट व्यावसायिक दृष्ट्या अपयशी ठरला तरीपण त्यानंतरच्या काळात प्रदर्शित झालेले त्यांचे सिनेमे बॉक्स ऑफिसवर “सिल्व्हर ज्युबली” ठरले. यामध्ये “फटाकडी”, “भिंगरी”, “मोसंबी नारंगी”, “भन्नाट भानू”, “गुलछडी” चा समावेश आहे, विशेष म्हणजे या चित्रपटांची निमिर्ती, दिग्दर्शन, लेखन अशा चौफेर बाबी सुषमा शिरोमणी यांनी समर्थरित्या सांभाळल्या; या चित्रपटां व्यतिरिक्त सुषमा शिरोमणी यांनी “बिजली”, “काका मला वाचवा”, “गुरु किल्ली” तर हिंदीमध्ये “प्यार का कर्ज” आणि “कानून” या चित्रपटांची निर्मिती केली, चित्रपट क्षेत्रात पदार्पण होताच त्यांची या विषयाची गोडी अधिकच वाढत गेली.