आमचे खेळ

या मित्रांनो सारे या, 
सर्व मिळूनी खेळू या   ।।धृ।।

खेळ आमच्या देशाचे
गरिबांसाठी सोईचे  ।
मैदान नको मोठे ते
वस्तूही अल्प लागते  ।।
 खेळांना त्या    समजून घ्या – १
—  या मित्रांनो सारे या,

हुतुतूचा खेळ बघा
दोन गट, छोटी जागा  ।
स्पर्श रेषा ओलांडूनी
ह्तुतू म्हणती तोंडानी  ।।
एकाच दमात   भिडू मारू या – २
— या मित्रांनो सारे या,

खो खो मध्ये चपळाई
चकमा देण्याची घाई  ।
उलट सुलट बसे
एकाच रांगेत दिसे  ।। 
मिळता खो    भिडूला पकडू या – ३
— या मित्रांनो सारे या,

लपंडाव हा खेळ कसा
लपलेल्यांना शोधत बसा  ।
राज्य येते त्यावरती
शोध घेई सभोवती  ।।
तीक्ष्ण नजर    ती ठेऊया – ४
—   या मित्रांनो सारे या,

आट्या पाट्या च्या खेळात
कांही घरे आखतात  । 
सीमेवरती दक्ष राहती
घरात येण्या ते रोकती  ।।
चपळाईने    घरात शिरू या – ५
— या मित्रांनो सारे या,

एका पायाची गम्मत
लंगडी आहे माहित?  ।
उड्या  मारीत पळावे
भिडू सारे पकडावे  ।।
आखल्या रेषेतच    खेळू या – ६
— या मित्रांनो सारे या,

एक दिलाने खेळू या
आनंद सारा लुटू या  ।
निरोगी सदा राही तो
प्रफुल्ल मन बाळगतो  ।।
शीण अभ्यासाचा    घालवू या – ७
— मित्रांनो सारे या,

— डॉ. भगवान नागापूरकर
9004079850
bknagapurkar@gmail.com