अस्तित्वाचा शोध

अस्तित्वाचा शोध हा माझ्या सर्वच लेखनाचा महत्वाचा धागा आहे . अर्थात सर्वांच्याच प्रेरणा या अस्तित्वाच्या शोधात असतात . आज एक वेगळी कविता आपल्यासमोर सादर करतोय.

अनेकार्थसूचनक्षमता आपल्यालासुद्धा जाणवेल.
जाणकारांनी अवश्य मतप्रदर्शन करावं .

दिवसभराचे ओझे घेऊन
सांज उगवली म्लानपणे ।
तमात भिजले एक पाखरू
पंख शोधिते दीनपणे ।।

झाडावरचे अबोल घरटे
विसरून गेले थरथरणे ।
विकल सावली ऐकू लागली
रातकिड्यांचे किरकिरणे ।।

शांत जलाशय किती कोरडा
चंद्र शोधितो क्षीणपणे ।
सभोवतीची हिरवळ अगतिक
मान लपविते शरमेने ।।

हळूच उतरल्या दवबिंदूना
चित्र दिसेना कुठे जुने ।
भग्न जाहल्या वाटेवरचे
अस्फुट होते हंबरणे ।।

दीप दिसेना निर्वाणीचा
शांत जलाशयी स्वप्न सुने ।
पंख शोधिता एक पाखरू
अगतिक झाले दीनपणे ।।

डॉ. श्रीकृष्ण जोशी , रत्नागिरी