बंधनातील चिमणी

चिव चिव करीत,  एक चिमणी आली  ।
दर्पणाच्या चौकटीवरती,  येवून ती बसली  ।।
बघूनी दूजी चिमणी दर्पणी,  चकीत झाली होती  ।
वाटूं लागले या चिमणीला,  आंत अडकली ती  ।।
उत्सुकता नि तगमग दिसे,  चेहऱ्यावरी  ।
चारी दिशेने बघत होती,  आंतल्या चिमणी परी  ।।
औत्सुक्याचे भाव सारे दिसती,  आतील चिमणीतही  ।
कशी करूं तिची बंधन मुक्ती,  काळजी लागून राही  ।।
चोंच मारीते आवाज करिते,  यत्न्य केले सारे  ।
श्रम होवूनी थकूनी गेली,  हातीं न कांहीं उरे  ।।
चिंता लागली चिंता बघूनी,  या चिमणीला  ।
चलबिचल ही जेवढी होती,  तसेंच दिसे हिला  ।।
स्वबांधवांना मदत करणे,  त्यांच्या संकटी  ।
पशू पक्षांतही दिसून येते,  तत्वें ही मोठी  ।।
चालले होते प्रयत्न निष्फळ,  या चिमणीचे  ।
परि जिद्द ठेवतां भान नव्हते,  आपल्या देहाचे  ।।
कांच पडली फूटून खालती,  तडा त्यास जावूनी  ।
एक आवाज  तेथे घुमला,  घाबरली चिमणी  ।।
जरी देह झाला रक्तबंबाळ,  यश चमकले तेथें  ।
समजत होती चिमणी बिचारी,  बंधन तोडले ते  ।।

डॉ. भगवान नागापूरकर
संपर्क – ९००४०७९८५०
bknagapurkar@gmail.com