छोटीला काय उत्तर द्यायचं (अलक)

नवरा नको नको म्हणत असताना तिनं उधारीवर नारळ, ओटीसाठी कापड आणि देवीच्या पूजेसाठी लागणाऱ्या वस्तू विकायला ठेवल्या होत्या.

नवरात्राच्या दहा दिवसांत दरवर्षी होणारी कमाई लक्षात घेऊन तिनं रस्त्याच्या कडेला दुकान थाटलं होतं.
पण रात्र झाली तरी एकाही भक्तानं काहीही विकत न घेतल्यानं तिच्या पोटात खड्डा पडला . डोळ्यासमोर अंधारी आली.

आज थोडे फार पैसे मिळाले की, ऑनलाइन शिक्षणासाठी कर्ज काढून घेतलेल्या मोबाईलचा रिचार्ज करता येईल असं तिला वाटलं होतं पण वाढणाऱ्या अंधाराबरोबर तिच्या मनातही अंधार गडद होऊ लागला. छोटीचा उद्याचा तास बुडणार होता. आता छोटीला काय उत्तर द्यायचं या विचारात ती हरवली आणि आदिशक्तीच्या डोळ्यात पुन्हा अश्रू उभे राहिले …

— डॉ. श्रीकृष्ण जोशी ,

रत्नागिरी

९४२३८७५८०६