जीवघेणा खेळ करणारी फौलादी मनगटे घोषणा देण्यासाठी उठतात तेंव्हा..!!

भीमथडीच्या तट्टांना यमुनेचे पाणी पाजणाऱ्या मराठ्यांना झालंय तरी काय? मुघलांच्या आणि अनेक शाह्यांच्या छाताडांवर थयथया नाचून स्वत:च्या मनगटातील ताकदीवर ह्या देशात हिन्दवी स्वराज्याची निर्मिती करणाऱ्या छत्रपती शिवाजी महाराजांची वंशपरंपरा मोठ्या अभिमानाने मिरवणाऱ्या ‘द ग्रेट मराठ्यां’नी आरक्षणासाठी इतकं लाचार का व्हावं..?

काळ्या छातीवर कोरलेली अभिमानाची ती लेणी कुठे खचली ? जीवघेणा खेळ खेळणारी फौलादी मनगटे घोषणा देण्यासाठी का उठावीत?

अरे आठवा तो आपला मराठ्यांचा दैदीप्यमान इतिहास..छत्रपती शिवाजी महाराजांनी यवनांच्या दाराशी मोर्चा नेऊन मला स्वराज्य द्या म्हणून निवेदन नव्हतं दिलं..महाराजांनी जे मिळवलं ते स्वत:च्या कर्तुत्वावर आणि म्हणूनच अलम दुनिया आज महाराजांचं नांव आदराने घेते..आपल्याला जे मिळवायचंय ते आपण आपल्या कर्तुत्वाने मिळवू आणि छत्रपती शिवाजी महाराजांना अभिमान वाटेल असं वागू असा विचार आपण का नाही करत?

दाही दीशा आपल्या टाचेखाली ठेवणाऱ्या मराठ्यांना आरक्षणाच्या भिकेसाठी मोर्चे काढताना पाहून एक मराठा म्हणून मला योग्य वाटत नाही..*अखिल हिन्दुस्थानवर राज्य केलेल्या रक्षणकर्त्या मराठ्यांनी मोर्चा काढायचाच तर सर्वच आरक्षण रद्द करावे म्हणून मोर्चे काढावेत.. निढळाच्या घामाला ओळख मिळावी म्हणून मोर्चे काढावेत*..

-गणेश साळुंखे
9321811091