करायचं आता काय ?

-विजय कुवळेकर

रेडा ऱ्हायला  गाभन आनिक म्हशीनं खाल्ली हाय
आक्रित आक्रित घडतंय समदं करायचं आता काय ?
सांगा करायचं आता काय ? ||

सखे म्हनाले,” तुम्हास्नी न्हाई ठाऊक आमची पावर”
“येवढं हाय तर ” म्हनलं ” हिंमतीनं गुंडान्ला घाला आवर”
“कुनाला सांगतोस,बेट्या” म्हनाले ; धरून सुऱ्याचा नेम
“करीन” म्हनाले,” तुमच्यासारख्या घुंगुरट्यांचा गेम ”
दमच भरला त्यांनी; म्हनाले,” परत बोलायचं नाय” || १ ||

डासानं मारला मानूस तेव्हा बॉस म्हनाले,”बास ,
“समद्यान्ला लावतो कामाला ह्यावर इलाज काढतो खास ”
भूतदयेचा पुळकावाल्या बाबाला झाला त्रास
“खबरदार जर कराल ” म्हनाला,” पर्यावरनाचा ऱ्हास ”
काय बी पेटूदे .. आगीवर ह्यांची पोळी भाजायची हाय || २ ||

तंबाखू चोळत ग्यानबा बसला …चुन्यात मिसळला कात
कोन मारतोय डोळा कुनाला… कुनाची रंगते रात
कुनाचा पायपोस कुनाच्या पायात…कुनाला कुनाची साथ
खरी कळावी कशी कुनाला पडद्यामागची बात
समदेच करत्यात कसं येड्याला दे माय धरनी ठाय || ३ ||

-विजय कुवळेकर