निसर्ग व्याप्ती

उंच चढूनी हिमालयी,      झेंडा तो रोविला
गीरीराजाचे शिरावरी,      विजय संपादिला   ||१||

उंचाऊनी  बघे मानव,      अथांग जगताला
विज्ञानाच्या जोरावरती,   अंतराळात गेला   ||२||

युगा युगाचा चंद्रमा,       केला अंकित त्याने
त्याच्या देही ठेवी पाऊल,   मोठ्या अभिमानाने   ||३||

अगणित दिसती गृहगोल,      त्याचा दृष्टीला
सीमा न उरली आता मग,      चौकस बुद्धीला   ||४||

चकित होतो प्रथम दर्शनी,      विज्ञाना बघता
दिसून येती अनेक गुढे,    एक एक उकलता   ||५||

किती घेशी झेप मानवा,       उंच उंच गगनी
वाढत जातील क्षितिजे,     तितक्याच पटींनी   ||६||

डॉ. भगवान नागापूरकर
९००४०७९८५०