निसर्गाचे मार्ग वेगळे

मार्ग निसर्गाचे सदा, निश्चित आणि अढळ  ।
चालतो त्याच दिशेने,  जसजशी येते वेळ ।।१।।

चालत आसता थांबे,  भटके वाट सोडूनी  ।
करूया काही आगळे  ठरवी  विचारांनी ।।२।।

आगळे वेगळे काय, त्याला जे वाटत असे  ।
नियतीची वाट मात्र,  त्या दिशेने जात नसे ।।३।।

परिस्थितीचे कुंपण,  टाकले जाते भोवती  ।
कळत वा नकळत,  मार्गी त्यास खेचती ।।४।।

करून घेतो निसर्ग,  वाटते त्याला हवे जे  ।
अकारण तुम्हा वाटते,  हे तर आहे माझे ।।५।।

जीवनाच्या सांजवेळी,  बघता मागे वळूनी  ।
प्रवास केला वेगळा,  हेच येते समजूनी ।।६।।

मिळूनी काही आगळे,  समाधानी वृत्ती येते  ।
आनंदाने निरोप घ्या, नियती तुम्हा सांगते ।।७।।

— डॉ. भगवान नागापूरकर 
९००४०७९८५०
bknagapurkar@gmail.com