पाऊस ओशाळला होता (अलक)

चिखल ओशाळला होता.
पाऊस त्याहून अधिक ओशाळला होता.
नदी नाले , धबधबे, ओढे…सगळे शरमिंदे झाले होते.
सगळी शेती, घरंदारं, झाडं, आड, विहिरी सगळं पुराच्या पाण्यानं वाहून गेलं होतं.
धरतीचं दुःख त्याहून अधिक होतं, कारण सगळी माती पाण्याच्या लोंढ्यानं ओरबाडून नेल्यामुळं वांझपणाच्या वेदना काय असतात ते ती साक्षात अनुभवत होती.

– आणि गळ्यापर्यंत , गाळात अधिकाधिक रुतत गेलेल्या शेतकऱ्याला, न्यूजचॅनल्स गर्दी करून विचारत होती,
” या क्षणी तुमच्या भावना कशा आहेत? काय वाटतं तुम्हाला?”

– न्यूज चॅनल्सच्या त्या प्रश्नांनी, चिखल , पाऊस , पुराचं पाणी मात्र लाजेनं काळं ठिक्कर पडत होतं!

— डॉ. श्रीकृष्ण जोशी