पेराल ते घ्याल

शत्रु तुमचा तुम्हींच असूनी   तुम्हींच कारण दुःखाचे  ।
सर्व दुःखाच्या निर्मितीपाठीं   हात असती केवळ तुमचे  ।।

बी पेरतां तसेंच उगवते    साधे तत्व निसर्गाचे  ।
निर्मित असतो वातावरण   क्रोध अहंकार मोहमायाचे  ।।

कसे मिळेल प्रेम तुम्हांला   घृणा जेंव्हां तुम्हीं दाखविता  ।
क्रोध करुन इतरांवरी     मिळेल तुम्हांस कशी शांतता  ।।

शिवीगाळ स्वभाव असतां   आदरभाव कसा मिळे  ।
शत्रुत्वाचे नाते ठेवतां   सलोख्याचा सांधा ढळे  ।।

इच्छा मात्र असते सुखाची    सदैव मिळावा आनंद  ।
शक्य होण्या वातावरणी      हवा प्रेमळ सुसंवाद  ।।

वागतां कसे या वरती  आवलंबून सारे असे  ।
वाईट वागण्याचे बी पेरुनी   चांगले उगवेल कसे  ।।

डॉ. भगवान नागापूरकर
संपर्क – ९००४०७९८५०
bknagapurkar@gmail.com