वश्याच ‘ क्युट ‘ लफड

नेहमी प्रमाणे मी मुडक्याच्या टपरीवर चहाचे घुटके घेत होतो . शाम्या आपला ‘खारीचा ‘ वाटा सम्पवत होता . आत्ता पर्यंत त्याच्या खारीनी दोन कप चहा पिवून टाकला होता . तिसऱ्या कपात शाम्या शेवटची खारी मोठ्या तन्मयतेने बुडवत होता .
“सुरश्या ,तुमच्या चहाचे बिल माझ्या कडे !मुडक्या मला कॉफी आण !” जमिनीत मुंडी खुपसलेल्या शहमृगा सारखा, मोबाईल मध्ये खुपसलेली मुंडी तशीच ठेवून वश्या माझ्या शेजारी बसला .
०००

आता येथे वश्याचा अल्प परिचय करून देणे क्रमप्राप्त आहे. (जेसे जसे तुम्ही आमच्या सोबत रहाल तसे तसे त्याचा दीर्घ परिचय होईलच ! ) याचे नाव वसंत जोशी . आम्ही याला वश्याच म्हणतो. (आणि म्हणत राहणार . तो त्याच लायकीचा आहे ! ) तो भरमसाट किमतीचे कळकट कपडे घालतो. कारण तो स्वतःला आधुनिक (त्याच्या भाषेत मॉड !) समजतो. ठीगळाचे शर्ट , मुंडीछाट टी-शर्ट ,फाटक्या , विटक्या रंगाच्या जीनच्या पॅंटी , त्याच्या भाषेत ‘कूल ‘असतात ! आम्हाला, म्हणजे मला अन शाम्याला हा ‘कंट्री’समजतो .  आमच्या वश्याचे (आता मित्रच कि, मग त्याला परका तरी कस म्हणायचं? ) दोन वीक पॉईंट आहेत . एक हा मोबाईल आणि ….. बाईल ! म्हणजे हा थोडासा त्या बाबतीत हा …. आहे . हा कुठेही, कोणाच्याही , अन कसाही तो प्रेमात पडू शकतो ! (आज पर्यंत तो खूपदा पडलाय ! काही वेळेला गुडघे ,कोपर सडकून निघालेत ! पण गडी ऐकत नाही !) कोणती हि ‘ती ‘ त्याला ‘क्युट’च दिसते ! याबाबतीत तो काळ ,वेळ , वय (त्याचे आणि तिचेही !), प्रत्यक्ष ,अप्रत्यक्ष कसाही प्रेमात पडू शकतो . म्हणजे नुसत्या फोटो वरून सुद्धाप्रेमात पडू शकतो ! पण अजून पर्यंत याचा पदरी काहीच पडलेलं नाही . अन पडणार कस ? बहुतेक वेळेला त्याची ‘एक तर्फी ‘ वाहतूक असते ! समोरून येणारी ‘ती’दिसते ,त्याचाच दिशेने येत असते ,पण रोड डीव्हाडर मुळे ‘ ती ‘भुरकून पास होऊन जाते !एकूण काय? तर,वश्याच्या ‘सादा ‘ ला काही ‘प्रतीसाद’ मिळालेला नाही ! श्याम्याने याच्या जन्माच्या वेळीचा किस्सा सांगितलाय . वश्या जन्माला तेव्हा त्यानं भोकाड पसरलं म्हणे . काही केल्या थांबेना . डॉक्टरांनी हात लावल्यावर तर यान आपला स्वर अधिकच तीव्र केला ! पण जेव्हा जवळच्या तरुण नर्सने घेतले ,तेव्हा तो चटकन रडायचा थांबला ! शाम्या न ड्याम्बीस आहे . त्याने हा किस्सा वश्याच्या आईच्या नावावर बराच खपवला आहे !
“खरं सांगतो सुरश्या , हा किस्सा खरा आहे !मला काकूंच म्हणाल्यात ! त्यांनी अजून एक गम्मत सांगितलीय !”
“कोणती ?”
” लहानपणी वश्याला  याची आजी गुटी घालायची . याचे आजोबा ,तिंबूनाना पण वल्ली . त्यांनी मुरुडशेंगे सोबत शिलाजीतची मुळी या गुटीच्या डब्बीत ठेवून दिली ! मग काय? रोज एक वेढा सहानेवर या मुळीचा पण पडायचा !म्हणून हा बालपणापासूनच बहकलाय !”
तुम्ही नका या शाम्याचा नादी लागू . येथे वश्याचे अल्प परिचय सम्पन्न होतंय .
०००

“काय वश्या आज एकदम ‘करंट’मधी ? क्या बात है ?” शाम्याने नवीन खारी मागवत विचारले .
“यार ,आज आपण एकदम खुश मड मध्ये आहोत . ”
“का ?काय झालाय ?”
मुडक्याने आणून ठेवलेला गरम कॉफीचा कप वश्याने तोंडाला लावला .
“आई SSS ग !”
वश्याचे असेचआहे .  सगळे चहा घेत असतील तर हा कॉफी मागवतो . का? तर ‘मी तुमच्या पेक्षा वेगळा आहे’ हे दाखवण्या साठी ! त्याला चहा -कॉफी बशीने पिणे गावंढळ पणाचे  वाटते ! नको ते करतो आणि फजित पावतो . आत्ता सुद्धा अदमास न घेता गरम कॉफीचा कप तोंडाला लावला आणि जीभ भाजून घेतली !
“वश्या , काय भानगड आहे ?” मी गंभीरपणे विचारल्यावर त्याची कळी खुलली .
“काय सुरश्या , तुला तर माहीत आहे !आपण कसे आहोत ते ! एकदम दिलदार !”
“मायला, सटी -सहामाही ला येतोस आणि चहाचे बिल दिले कि झालास का दिलदार ? बियर फियर पाज मग हवं तर दिलदार म्हणू !”शाम्या भडकला.
“शाम्या भडकू नकोस !आपल्याला वश्या नवा नाही ! हा, तू बोल वश्या . काय विशेष आहे ?का इतका खुश आहेस ?”
“काही नाही , नेहमीचंच ! गेल्या चार -सहा दिवसा पासून ‘ती’ सारखे मेसेज करतीयय !”थोडासा लाजत तरी आड्यातखोर पणे वश्या म्हणाला .
“कोण ‘ती ‘?” शाम्याने खारीखाण्यातून सवड काढून विचारले .
“आहे एक ! स्वीट हार्ट !”
स्वीट हार्ट ! म्हणजे वश्याच ब्र्यांड न्यू लफडं !
“वश्या , काय ?काय ?डिटेल वार सगळं सांग .” शाम्याने इंटरेस्ट दाखवायला सुरवात केली . म्हणजे जे काय असेल त्याचा शाम्या पार इस्कोट करणार !
थोडक्यात बातमी अशी होती कि , रोज संध्याकाळी सात वाजता वश्याला एक मेसेज येतोय . I LOVE YOU ! I AM WAITING FOR U !फोन नंबर आणि सोबत एक ‘ क्युट’ फोटो! आता पुढे काय करावे? या बद्दल आमचा ,म्हणजे माझा आणि शाम्याचा ,सल्ला घेण्या साठी वश्या येथवर आला होता !
“वश्या ,या लफड्यात पडू नकोस! हे खरे नसते !” मी माझे प्रामाणिक मत दिले .
“सुरश्या , तू न एकदा तिचा डिपी पहा ! मग बोल ! यार कसली क्युट ब्युटी आहे !”
“वश्या , तेथे कायपण टाकता येते ! या शाम्याने नाही का मारुतीचा फोटो डीपी म्हणून टाकलाय !”
“तू न खूप निगेटिव्ह आहेस ! ती माझ्या राजबिंड्या(हा हि एक वश्याचा स्वतः बद्दलचा भ्रम !) डी पी वर विश्वास ठेवून मला लव्ह करते . आणि तू म्हणतोस हे खर नसत ! मला खर कारण माहित आहे! तुम्ही माझ्या लक वर जळतय ! सुंदर पोरगी मिळतीय ,अन तीही या वसंताला !कस बघवेल ? तुम्हाला माझी प्रगती ,भरभराट पहावत नाही ! तुम्हाला मित्र म्हणायला मला लाज वाटते !—-”
“वश्या ,नवटंकी बस झाली ! . मला तुझी काळजी वाटते म्हणून तुला सल्ला दिलाय !”
“वश्या , तू त्या सुरशाकडे नको लक्ष देऊस ! तो नेहमीच पुढे जाणाऱ्यांनचे पाय मागे ओढतो ! मला जर विचारशील तर —–“शाम्याने थोडा पॉज घेतला .
“तर — तर काय ?”वश्याने अधिरतेने विचारले .
“तर मी हि हेच म्हणेन कि तू नको या लफड्यात पडू !”
“अरे पण का ?”
“का ?काय ? वश्या तुझ्यात ते डेअरिंग नाही ! तू ऐत्यावेळेस ढेपाळतोस !तुला  सिचुएशन सांभाळता येत नाही !मागे माधवीच्या वेळेस असेच झाले होते !”
“काय झाले होते ?”
“विसरलास ? बागेत भेटायला बोलावले होतस तिला . बाप आणि भावाला घेवून आली ! शर्टाचे जावूदे बनियन फाटेस्तोवर बदडला होतो तुला त्यांनी ! मी अन सुरश्याने कशी बशी तुझी सुटका केली होती !”
” नको रे त्या वाईट आठवणी काढूस ! पण नेहमीच असे होत नसते ! बी पॉझेटीव !”
शेवटी शाम्या पण वैतागला .
“ते मरू दे . तुझ्या मानत काय आहे ?”शाम्याने विचारले .
“मी म्हणतो ट्राय मारावा !”
“मार ! पण वश्या आम्हाला वाटते तूच निर्णय घ्यावा आणि परिणाम हि तूच भोगावे !आम्ही त्यात नाहीत !”मी वश्याला निर्वाणीचा सल्ला दिला .
“वश्या ,तू नको सुरशाच एकू ! हाण फोन ! दाखव डेअरिंग ! कुठ भेटती विचार !”शाम्याने शेवटचा घाव घातला .
वश्याने फोन लावला . ठिकाण ,वार ,वेळ ठरली !
000
चार दिवसांनी वश्या ‘ देवदास ‘ होवून मुड्क्याच्या टपरीवर आला . त्याच्या चेहऱ्यावरून काही तरी सॉलिड गोची झाल्याचे स्पष्ट जाणवत हाते .
“काय वश्या भेटलीकारे ‘ ती ‘ ?” शाम्याने विचारले .
वश्या गप्पच .
“वश्या नसेल सांगायचे तर नको सांगूस ! बनियन शाबूत आहे ना ?”मी हळूच विचारले .
“सुरश्या तू अन शाम्या मला का छळताय ? साला मी कसल्या दुखाःत आहे ?ते विचारायचं सोडून चेष्टा कसली करताय ?”
“वश्या ,चिडतोस कशाला ? आम्ही तेच तर विचारतोय ? त्या दिवशी तू ‘ती ‘ला भेटायला गेला होतास का ?”श्याम्याने नरमाईचा सूर लावला .
“हो !”
“मग ‘ ती ‘ भेटली का ?”
वश्या पुन्हा गप्पच .
“मायला ,वश्या काय झाल त्यादिवशी हे तू नाही सांगितल तर ,आम्हाला कस कळणार ? अन आम्हाला नाही कळल तर आम्ही काय डोम्बल मदत करणार ?”श्याम्याचा आवाज थोडा वाढलाच . त्यामुळे झाले काय कि मुडक्या गल्यावरून ऊठला अन आमच्यात सामील झाला !
“तू तर बोलूच नकोस शाम्या !तूच ‘कर डेरिंग’म्हणून भरीस घातलेस ! तिथच सगळा घोळ झाला !”
“हा खरय !मग काय करू ? नको म्हणतो तर तूच ‘ट्राय मारतो ‘ म्हणालास ! अबे , पण पुढे झाल काय ते तर सांग ?”
“कसच काय ? तेथे गेलो तर —–”
“तर ?तर काय ”
“मायला ,’ ती ‘ एक तो दाढीवाला बाबा निघाला ! ”
इतका वेळ, सत्यनारायणाची पोथी एकवी तश्या तन्मयतेने ऐकणारा मुडक्या टायर फुटल्या सारख हसला . त्याच हु SSS , हु SSS हसण बराच वेळ उसवत राहील . मी अन वश्या आश्चर्यचकित होवून हसत राहिलो . एखाद्या कॉल गर्लच झेंगट असाव असा आमचा कयास होता ,पण इथ तर —-वेगळच निघाल!
“गपा रे गधड्यानो ! काय गाढवा सारख खिदळताय ! “वश्या ओरडला .
पिन ड्रोप सायलेन्स झाला !
“वश्या आम्ही नकोच म्हणत होतो . तू ऐकल नाहीस . पण झाल ते झाल . आता आमच्या कडून तुझी काय अपेक्षा आहे ?” शाम्याने विचारले .
“शाम्या , मला न या LOVE U च्या मेसेज पासून सुटका पाहिजे !”
“मला बियर पाजणार ?”
“देतो !पण पुनःपुन्हा हा मेसेज यायला नको !”
“वश्या, अबे तो नंबर ब्लोक कर ना ! कशाला या शाम्याला बियर साठी सोकावून ठेवतोस ?”मी सजेस्ट केले .
“तू मला बेकुफ समजतोस काय ? दोन दिवसा पूर्वीच ते करून पाहिलं !”
“मग ?”
“मग ,काही नाही . दुसऱ्या नंबर वरून तोच मेसेज येतोय !”
आता मी हि कोड्यात पडलो.
शाम्या कसा काय इन कमिंग मेसेज थांबवणार ?
” तर मग ठरल ! बियर पार्टी ! काय वश्या ?”
“ठीक आहे !”मलूल आवाजात वश्याने कबुली दिली .
“वश्या ,आण तुझा तो मोबाईल . ”
शाम्याने वश्याच्या मोबाईल वर मेसेज टाईप करायला सुरवात केली .
“HALLO, DARLING, I LOVE U TOO!! I HAVE A SPECIAL AND PERSONAL NUMBER FOR THIS SWEET PURPOSE! CONTACT ME ON THE FOLLOWING NUMBER ONLY, HEREAFTER!”
“वश्या , तुझ्या त्या टकल्या साहेबाचा फोन नंबर सांग !”
“ते ,बेन ,इब्लीस आहे !तुला कशाला त्याचा नंबर पाहिजे ?”
“पाय धू म्हणल कि धुवावे ! बाकी इचारू ने !”
वश्याने नंबर दिला . शाम्याने तो नंबर त्या मेसेज मध्ये घालून तो LOVE Uला फॉरवर्ड करून टाकला !

वश्या निघून गेला होता .
“शाम्या हि डोकेबाजी कशी काय जमती रे तुला ?”
“त्यात काय डोक्यालिटी ? तुला म्हणून सांगतो सुरश्या , हे  SMS मलाच येत होते ! मीच वश्याचा नंबरवर डायव्हरट केले !या पुढे सारे मेसेज वश्याच्या ‘इब्लीस ‘साहेबाना छळणार ! ”
मी त्या दिवशी श्याम्या साठी चहा -खारीची पार्टी दिली !

— सु र कुलकर्णी.

आपल्या प्रतिक्रियांची वाट पहातोय . पुन्हा भेटूच . Bye.